قصة فصل ثالث جيم تفطس من الضحك

من طرف ب.الخراشي الخميس نوفمبر 20, 2008 12:13 am

اجتماع المدرسين

المدير : شوفوا لكم حل بثالث جيم فشلونا سمعتهم واصله اخر الدنيا وجانا كم إنذار من وزارة التربية والتعليم كله بسبتهم وبكرة بيجينا موجة مخصوص علشانهم

الأستاذ فاروق الفستئاني ( الفستقاني ) : ( بلهجة سورية ) شوووف استااااز تالت جييم مابيجي من ورا راسون إلا المشاكيل .. انا بأتريح ( اقترح ) توزعون على المداريس التانية .. كل مدرسه ارمي عليها شي اتنين تلاتي وريح راساك أخي

رائد الفصل ( حسنى شمعة ) ( لا شعوري ) ( بلهجة المصرية ) : نفصلهم !! .. وأبطل دروس خصوصية يعني وإلا إيه!! .. أصدي أنا عندي فكرة هايلة حتحسن صورتهوم أودام الموقه ( موجة ) وحخليه يئول إن كل الكلام اللي سمعه عنهم إشاعات

المدير : بس شوف ياحسني هذي اخر مرة لك انت وياهم والا فصلتهم كلهم واولهم انت .. بشوف وش تسوي فيهم وإلا هم وش بيسوون فيك

طابور الصباح

مشهد طابور المدرسة الصباحي الطلاب صافين والمدرسين والمدير مع الموجة

حسني شمعه ماسك ميكرفون الاذاعة المدرسية : والان الإزاعة المدرسيه لهزا اليوم مع .. تالت قيم

المدير مستغرب للاستاذ فاروق : والله اللي فشلنا

فاروق فسئاني باستغراب : تالت جيم العمي .. ويروح للإذاعة بسرعة

طلاب الطابور ضحك واستغراب يلتفتون على بعض وهم يقولون ثالث جيم ثالث جيم .. بيجيبون العيد

حسني الشمعة يعطي الميكرفون لعلي الدب ويقول لهم ياولاد زي مااتفقنا .. وروهم انكو أد المسئولية
الإذاعة المدرسية

على الدب يجرب الميكرفون : الو الو .. اخوه سعد المعصقل من وراه حول حول

علي الدب : مدير المدرسة الفاضل أبائي المدرسين إخواني العيال : سعد ابوعصاقيل سليمان العربجي وممدوح القرد وابو ريحه .. الاستاذ فاروق يضرب علي الدب على علباه طااااخ .. إحكي ولاه

على الدب : السلام عليكم ورحمة الله وبركاته أسعد الله صباحكم باليمن والبركات خير ما نستهل به اذاعتنا لهذا اليوم ايات عطرة من القران الكريم يتلوها على مسامعكم الطالب : حمود المطوع

يجى حمود المطوع ويقرا سورة قصيرة بصوت رخيم

علي الدب : اما الان مع فقرة هل تعلم للطالب حميدان أبو ريحة

حميدان بصوت عالي : هل تدري .. هل تدري إن للذبابة ستة أعين .. هل تدري وإلا ماتدري إن الفار يصيب بمرض الطاعون .. هل تدري وإلا ماتدري أن اذا قطعت شوارب الصرصور يقعد يخبط في الجدران .. هل تدري وإلا ماتدري أن لكل قطو برميل زبالة مخصص يسكن فيه وشكرا

علي الدب : هل تدري ان بيت حميدان جنب البلدية .. أما الان مع حكمة اليوم والطالب سلوم المفهي

سلوم المفهي يقرب يمسك الميكرفون بيد واليد الثانية في مخباه تحوس يدور الورقة اللي فيها حكمة اليوم .. يطلع الورقه ويقول : حكمة اليوم .. ويفتح الورقة ويقرا بصوت عالي .. البضاعة المباعة لاترد ولاتسبدل .. يسكت شوي ويناظر الورقة ويكمل شماغ طاقيتين شراب العايلة ثلاث فنايل علاق سروال سنة زبيرية .. وهو جالس يقرا ألا وذاك الكف على علباه من الاستاذ فاروق وهو يقول : العمى شو حمااار .. ولاه طلع الورأه ( الورقه ) ياللي فيها حكمة اليوم مو فاتورة ملابساك .. سلوم المفهي طيب طيب يدخل فاتورة ملابسة بمخباه
--------------------------------------------------------------------------------
علي الدب : الاَن مع موضوع الصباح للطالب أخوي سعد أبوعصاقيل

سعد يفتح ملف أخضر علاق ويقرا

اعزائي المشاهدين .. موضوع حلقة اليوم العطلة الصيفية ( مدمن فضائيات )

لقد رحنا في العطلة الصيفية أنا وأهلي إلي بلدي الثاني لبنان

علي الدب : تراه تسذوب .. بالعطلة رحنا لخوالي بشقراء

سعد يلتفت إلى علي الدب بزعل ويكمل .. ولكن علي الدب لم يكن معنا .. ويطلع لسانه لعلي الدب

رحنا بالطيارة و كانت امي خايفه جدا جدا لانها اول مرة تركب طيارة بس انا اصلا دايما اركبها وفي الطيارة جت شغالة الطيارة وجابت لنا القهوه والشاي ثم جت وقالت اقلطوا على العشاء وقلطنا في المقلط مع العفش وكان الطيار واقف على روسنا ماسك اللبن وقال سموا على عشاكم يالله إن تحييكم وكان مفطحا شهيا وخلصنا وغسلنا وكان ومساعد الطيار ماسكن الفوطة والطيب وأعواد الاسنان

وعندما وصلنا لمطار الملك خالد حقهم ذهبت انا لتختيم الجوازات والرخصة والاستمارة وذهبت امي للتطبيق وكنت اتحدث لغتهم بطفاقة لاني امي وابي مامعهم لغة .. وقال لي العسكري : جواز مين هيدا ؟ .. فقلت له بييَ ( ابوي باللبناني ) .. وقال : وهيدا؟ .. قلت : مييَ ( أمي ) .. وهيدا ؟ .. قلت خييَ ( أخوي ) .. وقال : وهيدا ؟ .. قلت : نييَ ( أن ) .. وكان جوازي

وقال لي ابوي ماشاالله عليك ياوليدي إنك بلبل سداح في اللغة اللبنانية الفصحى .. التفت عليه وقلته أي لا كان ثم التفت للبناني وقلت له ترى أنا سعودي مانيب زيكم .. وشكله كان مستغرب يحسبني لبناني

وفي لبنان سكننا في مدينة بيروت مشيط وكانت مدينة جميله فيها مزارع بكل مكان ولم اشوف عندهم تراب علشان كذا مافيهم الاشهب .. ورأيت دولا كثيرا وشفت دولة وماعرفتها يوم دققت مكتوب عليها بورسعيد .. وشفت المملكة العربية السعودية الشقيقة ( وش عنده اللبناني )

ثم ذهبنا الي الاهرامات وكل واحد مننا ركب له على واحد انا ركبت على الخنصر وأخواني واحد ركب على البنصر وعلي الدب ركب على الوسطى .. يلتفت لعليان اجل رحنا لخوالي ها

اما ابوي فركب على أبو الهول لأنه يشبهه وكانت رحلة سعيدة ورجعنا بالسيارة ومررنا على تونس الخضراء والسودان السوداء في الطريق عبينا بنزين بعشرة لاننا فلسنا وكملنا الطريق الي أن وصلنا بالرفاء والبنين .. وإلي اللقاء في حلقة القادمة

علي الدب : أما الان .. صوت جوال يدق من مخبا علي الدب ويطلع الجوال والميكرفون بيده وطبعا صوت المتصل واضح لان قريب من الميكرفون وكل الطابور يسمعونه
صوت حرمه : ألو ..

علي الدب : هلا بهالصوت ممكن نتعرف

الحرمة : وجع يمصع ضلوعك .. أنا أمك حصيصة

عليان بصوت مرتبك : يمه ..

طلاب ثالث جيم اللي وراه : اسم امه حصيصة .. اسم امه حصيصه ( بما فيهم اخوه سعيد ابوعصاقيل )

علي الدب : يمه شغلى الرادو .. بتشوفينا انا وابوعصاقيل على قناة المدرسة إف إم

حصيصة : الرادو مايشتغل إنت ناسي إن دشنا خربان .. علي وراك سارقن جوال ابوووك أنا زاهمتن عليه وطلعت لي إنت

علي الدب : مهوب أنا .. أنا أصلا صار لي اسبوع ماشفت جوال ابوي

حصيصة : اجل اللي تكلم منه وشو ؟! .. هذا مهوب أنا أنا أخوي سعد

حصيصة : اشوى احسبه إنت

علي الدب يلتفت على سعد المعصقل : إنت معلم إمي أن الجوال معي يالحروش

سعد يحاول يكلم امه في الجوال : يمه يمه .. حنا الحين في الاذاعة وإنتي على الهوا .. عندك مداخلة والا طبخة

علي الدب : والان مع الشيفة ( الطباخة ) أمي

حصيصة : ماشيفة الا إنتم وابوكم .. وتسكر الخط

الاستاذ فاروق يسمك راس علي الدب وسعد المعصقل ويصكهم ببعض طرااخ .. وياخذ الجوال كمل ولاه فورت لي دمي

علي الدب : اما االان مع نشيدة الصباح وسليمان العربجي بعنوان عصفوري الصغير

علي : سليمان وش عندك لابس بدلة حمرا

سليمان : لأني أول مرة بمسك ميكرفون قدام الجماهير

سليمان ياخذ المكرفون ويقول : أحلي تحية لشباب ثالث جيم اللي على البيست .. وأحلى تحية للموجه والمدير وأحلى تحية للوكيل بغيابه .. وياشباب اللي يبغى إغنية يكتبها على منديل ويعطيها المدرسين يوصلونها لي

سليمان العربجي : أويلي .. أويلي .. أويلي أويللللي

سود العيووون إكبار .. والشامة حلووووة

شايل جمال الكوون .. وباليني بلوى

يحط الميكرفون تحت ابطة ويقول : يلا كلنا سوى .. ياثالث جيم

هالعيون شلون املها سحر ذوبني بغزلها

بوسه من عندك حبيبي تسوى عندي الدنيا كلها

طلاب المدرسة كلهم يرددون وراه ويغنون وتنقلب المدرسة مرقص وهيصة

--------------------------------------------------------------------------------
السعودة

المدير بعصبية : ماني قايلكم فشلتونا كله منك يا حصني ( يقصد حسني ) خلاص ضف وجهك انت وطلابك .. مالقيت تحطهم في الاذاعة الا يوم جا الموجة .. والله مايندرا وش بيصيرفينا

ويدخل عليهم شاب سعودي في مقتبل العمر تظهر عليه علامات النشاط والحيوية ( جنتلمان ) .. أنا المشرف الطلابي الجديد جايكم من ادراة التعليم لحل مشاكل بعض الطلاب اللي عندكم

المدير: بس وهذي هي اقصد .. مدير المنطقه التعليمية ماأصدر معك قرار .. يعني نق .. فصل .. سجن .. تعزير

المشرف بإبتسامة : لا .. وليه كل هذا المسألة ومافيها ان الطلاب عندكم عندهم امكانيات وطاقة مهدره ماعرفنا كيف نستغلها في صالحهم .. انا متابع موضوع ثالث جيم عندكم من بداية السنة واعرف ان عندهم طاقات جباره بس يبغي لها تتوجة التوجيه الصحيح بس يحتاجون بعض الاهتمام والوقت .. ماعندهم مواهب أو هوايات معينة ؟
الاستاذ فاروق : أيه بلا .. عندن مواهب في الخباسه والاجرام

المشرف : لا .. انا ابغى الاشياء المميزه فيهم ماحاولتوا تستغلونها في صالحهم وصالح المدرسة ومجتمعهم ووطنهم

حسني شمعة: دول أبالسة

لمشرف : كل أنسان فينا لازم يكون مبدع في شي مهما كان بس يبغي مين يكتشف هالعملاق اللي في داخله ويصقله حتى لو ماكان ماهو مميز اكيد بيكون عنده هوايه لشي بتفيده وتفيد مجتمعه وتشغل وقته اذا عرفنا نستغلها

المدير يرد وشكله تأثر بكلام المشرف : كلامك منطقي

الهروب الكبير

المشرف مع الاستاذ حسني يراقبون طلاب ثالث جيم وهم يهربون من المدرسة .. علي الدب ياخذ الشناط والكتب ويحذفها من الدريشة ويوصلها لبرى المدرسة من قوة الحذفة .. سعد ابوعصاقيل يركض وينط على السور المرتفع ويجمع الكتب ويقرب السيارة لهم .. سلوم المفهي هرب وجلس يرسم على الجدران صور كاريكاتيرية للمدير والمدرسين وعياراتهم

حسني للموجة : زي مانت شايف سعاتك .. حئولك إيه وإلا ايه دول مجرمين محترفين

المشرف: ماشاءالله ابداع قمة في المهارات

شباب المستقبل

وبعد كم سنة وبعد أن أصبح المشرف السعودي مسئولا عنهم .. صار سعد ابوعصاقيل اللي ينط السور بطل المملكة في الوثب العالي .. الدب اللي يحذف الكتب من الدرايش بطل اسيا في رمي الجلة .. وسلوم اللي يرسم على الجدران اخذ جائزة المركز الأول في الفن التشكيلي على مستوى الخليج